吳少萍菩薩-一齊建設人間淨土，人間處處有幸福

 「感恩得福田」

萬分感恩諸位法師、主持人、班長及內外護團隊、各位善知識，成就這期福田班！

眼見每堂福田班有無數的義工默默奉獻、這期更有多位澳門菩薩，披星戴月遠道而來上堂，深深印證師父叮嚀：能夠到道場學習、支援，是我們多生多世積累的福報，得以回歸佛陀本懷。

我和不少福田班同學交流時，都發現法鼓山獨特之處，亦是我們留在法鼓山修行的助力：全面教育。相信大家印象深刻的一堂課，描述師父由帶領農禪寺，到向教育部登記立案創辦法鼓山，彰顯師父高瞻遠矚、睿智無比。

福田班的學習主題，緊扣法鼓山的教育理念：由福慧人生導航儀、心靈法寶無盡藏，到大關懷、大普化、大學院，以至上一堂常寬法師的「中華禪法鼓宗」，生動講解禪一、禪七、禪四十九....我心想，原來福田班十堂課，是禪十！相比秒殺報名的香港禪一、總山禪七，我們福田班學員太幸福啦！

我們在福田班學習用禪法，練習內在安定，時刻「清楚放鬆、全身放鬆」，再細味每次資深菩薩的「生命故事」的啟示，成為源源不絕的「萬行菩薩」能量，持續在日常生活中擴展內心安定，至外圍環境。大家無論支援了多少個小時、那一個崗位，都必定體驗過收穫總是高於付出。

2024年將至，就讓我們以「人間有幸福」為共同學習成長的目標，珍惜在道場支援、修行，奉獻我們自己，從而薰陶更多社會大眾到道場修行，一齊建設人間淨土，人間處處有幸福。

祝願各位平安健康、福慧圓滿、所作皆辦、具諸佛法、早證菩提！阿彌陀佛！

梁振中菩薩-以事成人

好感恩有因緣可以上到福田班，令我諗起常禮法師同我們分享和尚托空砵，大象戴瓔珞的故事，好明白種福田儲福得資量對學佛的重要性，同時好感恩可以來法鼓山香港道場做義工，學做一個萬行菩薩

其實未來道場之前就已經好想來做義工，因為好讚歎法鼓山做的事對這個世界的貢獻，所以覺得來做義工是一件好有意義的事

以前都有在不同的團體做過義工，所以明白到要在一個團體做一個稱職的義工，就要同該團體的理念同方向一致，所以就選擇上福田班，希望通過福田班可以做到一個稱職的義工

10堂的福田班令我對法鼓山有更深入的認識，仲學習到好多，當中好深刻常禮法師同我們提及以事成人，令我會好好記着來做義工除了要安排好每件事之外，更加重要是通過做義工作為修行同鍛鍊

期待在不同的義工崗位再次見到各位菩薩
祝福大家常行精進，成就共修

黃玉儀菩薩-奉獻我們自己，成就社會大眾

大家好！我是代表內護，我是黃玉儀

我現在非常緊張，因為從未試過係咁多人面前發言。當班長邀請我做內護崗位時，心情都有點緊張，因為從未接觸過這崗位，後來看了工作內容後覺得可以應付得來便答應了班長；另一方面可以重温福田班課程內容再次加深了解。

當中了解到統籌福田班需要時間及其他不同組別的義工菩薩護持，如(知客，內外護，文教組，音控，攝影，香積，你們的關懷員) 來成就的，重要是你們報讀福田班，成就各位義工菩薩發心回來護持，四眾佛子共勉語其中兩句(奉獻我們自己，成就社會大眾)在服務過程中，成長了自己，也成就了他人，同時也可以檢視自己的身口意，以消融自我來配合團隊的需求，期待日後在義工崗位上碰到大家一起學習，共同成長！
感恩大家！

施鋇徽菩薩-邊度需要我，我就去邊度

一年前Maggie師姐邀請我擔任關懷員時，我竟然冇考慮太多，只睇到時間合適就答應。當時都有因為Maggie師姐找我做關懷員而感到錯愕。因為關懷員應該要具備一些特質同要求，而且亦係一個承諾。所以答應了的第二天就後悔了。因為喺我原本嘅義工崗位中，除咗青年五日禪外，冇試過要承諾過要返足十個月嘅堂，仲要同一班組員一齊。

而且後來知道組員係混齡，對我嚟講都係挑戰。在糾結的過程中，如果反口Say no, 又覺得會帶俾團隊麻煩。諗到師父講過「邊度需要我，我就去邊度」，可惜我有排都未到師父的level，然後又諗到師父話「修行係帶少少勉強」，我就面對接受呢個挑戰。呢個挑戰而家一年後望返轉頭，對我好有得著。
所以第一位我想多謝嘅係Maggie師姐，雖然我而家都未知道點解當時佢邀請我。

後來內部邀請悅眾參加福田班，阿邦叫我提名時，雖然我哋都未上過福田班，但課堂內部大概有8成都喺唔同活動聽過，但為咗有人陪我一齊上堂，唔使咁悶，法青活動組悅眾我逐個誠意邀請，佢哋竟然答應。當時我好開心，全部都係friend, 以為法青組會被安排喺同一組，點知我幻想太美好，現實係大家分布喺唔同組別。但小息時都好開心好似gathering；甚至大家抄唔切notes，又會喺群組求救。在座嘅法青悅眾，多謝陪咗我十堂。

當然我唔只拉咗班法青落水，仲拉埋我阿媽。因為我係先斬後奏幫我媽報咗名先同佢講要嚟上堂。師父話不勉強他人，我媽就俾我勉強咗嚟上堂。以前我阿爸阿媽係會一齊返嚟參加道場活動，但自從我爸走左之後，我媽就唔願意返嚟。不過後來我話返嚟陪我啦，估唔到我媽每次上堂仲比我認真。9月1 十號風球嘅時候，我喺屋企攤喺梳化放風假，呢個時候阿媽話「我嗰組嘅關懷員師姐WhatsApp 問候我地打風有冇事，你有冇關懷吓你嘅組員？」 我話「梗係冇啦！」   我馬上WhatsApp 關懷組員，所以我好多謝我媽提醒，亦都多謝關懷員們以身作則，俾我學習師父所講嘅「適時關懷親人朋友，則處處溫暖」。同時都多謝我嗰組嘅組員包容，成日俾我推佢地出去分享，但我係真心覺得佢地分享嘅內容係好有啟發。

而我亦都好讚嘆福田班同學，其實我唔係好認得大家，但大家真係實踐緊禮儀環保。每次喺道場見到面，都會同我打招呼。而有一次喺台北機場同一位學員對上眼，對方好熱情同我打招呼，但我其實唔認得佢。所以大家真係會將課堂上學習到嘅唔只喺道場實踐，而係落實喺日常生活中。而且大家返嚟做義工當值，我發現大家好肯付出，每次返嚟見到大家當值義工，我聽到最多係「等我嚟！」，師父話 「盡心、盡力、盡可能學習」，大家嘅發心，係我要謙卑向大家學習。 

最後要多謝法師同整個班長團隊同所有關懷員，今屆由上年開始籌備。每日上堂最早到由係佢地，最遲走又係佢地，最遲食飯又係佢地。我地睇到嘅、睇唔到嘅所有付出，就正正係俾我感受到咩係「奉獻我們自己，成就社會大眾」
我問過ChatGPT「關懷員」要有咩特質，佢話：同理心、專業知識、溝通能力、彈性和耐心、敏感度、專業倫理準則。但呢個係坊間嘅特質，而道場嘅關懷員或者義工，只要記住「四眾佛子共勉語」，個個都係關懷員